काठमाडौँ । बीपी राजमार्गअन्तर्गत काभ्रेपलाञ्चोकको अमलटारी क्षेत्रमा खसेको पहिरो पन्छाइएपछि अवरुद्ध सडक पुनः सञ्चालनमा आएको छ। पहिरोका कारण रोकिएको सवारी आवागमन आज बिहानदेखि पुनः सुचारु भएको प्रहरीले जनाएको छ।
प्रहरीका अनुसार काभ्रेको रोशी गाउँपालिका–७, ८ र ९ का विभिन्न स्थानमा लगातारको वर्षापछि पहिरो खस्दा बीपी राजमार्ग पूर्णरूपमा अवरुद्ध भएको थियो। सडक अवरुद्ध हुँदा यात्रुवाहक तथा मालवाहक सवारीसाधन दुवैतर्फ रोकिएका थिए।
सडकमा खसेको पहिरो हटाउने कार्य सम्पन्न भएपछि आज बिहान ७ः४० बजेदेखि सवारीसाधन सञ्चालनमा ल्याइएको प्रहरीले जानकारी दिएको छ। अहिले राजमार्गमा सवारीसाधन सावधानीपूर्वक सञ्चालन भइरहेको छ।
यस्तै, बीपी राजमार्गअन्तर्गत रोशी गाउँपालिका–९ पिन्थलीबेंसी क्षेत्रमा झरेको लेदोसमेत हटाइएपछि उक्त खण्डमा पनि यातायात सेवा पुनः सञ्चालन भएको सडक डिभिजन कार्यालय भक्तपुरका प्रमुख सुमन योगेशले बताएका छन्। सडकमा थप पहिरो खस्ने जोखिम कायम रहेकाले आवश्यक सतर्कता अपनाएर मात्र यात्रा गर्न सम्बन्धित निकायले आग्रह गरेका छन्।
